Panumbu Catur

PANUMBU CATUR

Panumbu catur atawa sok disebut moderator téh nyaéta nu ngatur lumangsungna kagiatan diskusi atawa rapat. Tugasna béda jeung panata acara atawa MC (Master of ceremony). MC mah tugasna mingpin sakabéh runtuyan acara. Ari tugas utama panumbu catur mah minangka panengah atawa wasit dina kagiatan diskusi. Nya panumbu catur pisan anu ngatur diskusi ngeunaan hiji masalah.

Dina lumangsungna kagiatan diskusi, panumbu catur kudu boga sikep nétral atawa teu mihak ka salasahiji pihak. Lamun aya konflik dina lumangsungna kagiatan, kudu bisa merenahkeun diri jadi panengah.

Saméméh ngalaksanakeun tugas jadi panumbu catur, aya sawatara hal anu perlu dilakonan, di antarana:

1. Ngawasa masalah anu luyu jeung téma kagiatan. Hadéna mah urang geus maca heula makalah atawa matéri unggal narasumber.
2. Mikanyaho kaayaan pamilon nu hadir dina kagiatan diskusi. Moderator kudu bisa ngatur pamilon sangkan sumanget dina miluan kagiatan diskusi.
3. Mikanyaho riwayat hirup jeung kalungguhan/pagawéan narasumber, sangkan teu salah nyebut ngaran atawa pagawéan narasumber.
4. Mikanyaho runtuyan acara, lilana waktu anu disadiakeun pikeun unggal narasumber, tanya-jawab, istirahat, jeung bisa ngatur suasana diskusi.
5. Nyiapkeun buku catetan pikeun nyatet poko-poko penting nu ditepikeun ku narasumber jeung pertanyaan anu diajukeun ku hadirin.
6. Nyiapkeun papakéan anu sopan luyu jeung téma kagiatan, sarta alat panuduh waktu sangkan acara bisa lumangsung luyu jeung jadwal nu geus ditangtukeun.

Sedengkeun anu kudu dilakonan ku panumbu catur dina lumangsungna kagiatan diskusi, nyaéta:

1. Datang leuwih ti heula ti batan pamilon.
2. Mariksa sagalarupa hal nu ngadukung lumangsungna diskusi: sound system (mikrofon), buku catetan, ngatur hadirin sangkan tartib, jeung sajabana.
3. Ngawanohkeun diri ka narasumber saméméh dimimitian acara, sangkan urang leuwih akrab dina lumangsungna diskusi.
4. Maca heula biodata unggal narasumber kalawan bener.
5. Ngatur diskusi, ngatur nu nanya, jeung bisa jadi panengah upama aya konflik jeung bébédaan pamadegan atawa pamahaman.
6. Nyindekkeun hasil diskusi.

Dina prak-prakan jadi panumbu catur téh strukturna kabagi jadi sababaraha bagian, nyaéta bubuka, ngawilujengkeun ka pamilon jeung pedaran singget kagiatan diskusi, ngawanohkeun narasumber jeung topik diskusi, méré waktu ka narasumber pikeun medar matérina, méré kasempetan nanya ka

pamilon, jeung panutup.

Sangkan leuwih tétéla, ieu di handap dijelaskeun pancén atawa tugas panumbu catur dina ngatur lumangsungna hiji kagiatan diskusi. Engké pék ku hidep praktékkeunjeung babaturan.

Bubuka.

Assalam’ualaikum wr. wb. Sampurasun! Ti payun urang sanggakeun puji sareng sukur ka Gusti Nu Maha Suci anu tos masihan kaséhatan ka urang sadaya. Hatur nuhun ka sadérék panata acara anu tos masihan kasempetan ka sim kuring kanggo janten panumbu catur dina ieu kagiatan.

Ngawilujengkeun ka pamilon jeung nepikeun pedaran singget kagiatan diskusi.

Wilujeng sumping ka para pamilon ieu diskusi. Ieu diskusi téh dilaksanakeun lantaran ayana rasa prihatin kana kaayaan lingkungan anu beuki dieu téh beuki ruksak, di antarana dilantarankeun ku miceun runtan di mana waé, nu antukna nimbulkeun caah atawa banjir. Tujuan ieu diskusi téh nyaéta kumaha sangkan urang bisa ngajaga lingkungan sangkan beresih, séhat, jeung henteu nimbulkeun musibah.

Ngawanohkeun narasumber jeung topik diskusi.

Dina ieu kasempetan narasumber, Bapa Udin Supidin, ahli dina widang kaséhatan lingkungan, badé medar matéri ngeunaan ‘Ngajaga Kaberesihan jeung Kaséhatan Lingkungan’.

Méré waktu ka narasumber pikeun medar matéri.

Supaya ieu acara lumangsung kalawan kalancaran, sim kuring Asép Soléhudin, badé ngamoderatoran atanapi jadi panumbu catur dugi ka réngséna. Ka Bapa Udin Supidin sumangga dihaturanan kanggo ngabahas matéri salami 10 menit.

Méré kasempetan nanya ka pamilon

Tah, mangga ayeuna ka pamilon ieu diskusi bisi aya anu can paham atawa panasaran kumaha ngajaga kaberesihan lingkungaan, dipasihan waktu kanggo ngadugikeun pertanyaan ka narasumber. Tong hilap sebutkeun nami sareng ti mana asal.

Panutup

Alhamdulillah, ieu kagiatan diskusi téh tos réngsé. muga-muga mangpaat sareng jadi panyumanget kanggo urang dina ngajaga lingkungan. Hapunten tina sagala kalepatan. Mangga nyanggakeun deui ka panata acara. Wassalamualaikum wr.wb.

Contoh teks panumbu catur kesehatan (bahaya narkoba keur para remaja)

Bapa/Ibu kalih rerencangan sadaya anu dipihormat. Puji sinareng sukur sumangga urang sami-sami sanggakeun ka Hadirat Allah SWT kalayan rahmat sareng magfirat ti manten-Na urang tiasa ruing mungpulung dina ieu riungan kalayan kawilujengan.

Dina danget ieu sim kuring Bapa Arif Rahman, saparakanca ti bade medar pasualan “Bahaya Narkoba keur para Rumaja”. Ieu pasualan teh kalintang saena ku urang sawalakeun, jalaran beuki dieu jalmi teh seueur anu ngonsumsi komo ngedarkeun narkoba. Keur naon eta narkoba digunakeun keur jalmi ? Jalmi ayeuna mah seueur anu ngedarkeun narkoba paranti di jual atawa diedarkeun ngarah loba duit.

Sim kuring sareng rerencangan, gaduh pamadegan yen narkoba teh bisa ngabahayakeun jeung ngarugikeun diri sorangan, diantawisna :

1. Masa depan para rumaja di indonesia teh jadi suram
2. Teu bisa ngabagjakeun Kaluarga, agama, jeung nagara
3. kacanduan, anu bisa nyieun jalmi teh teterusan ngonsumsi eta narkoba
4. Bisa oge ngaakibatkeun kematian

Rupina eta pamendak sim kuring saparakanca. Mangga ayeuna sim kuring ngahaturanan rerencangan sadayana, bilih aya anu bade mairan, nambihan atawa nyempad. Sumangga dihaturanan!

Elis : Ceuk abdi mah ,saha wae jalmi anu masih ngagunakeun eta naroba teh kudu digeuingkeun. Ngarah sadar lamun narkoba bisa ngarugikeun sorangan! urang oge kudu jaga pergaulan, jeung ulah ngadeukeutan jalmi nu sok make narkoba!

Sugianto : Sim kuring panuju kana pamadegan fuji, mung aya tambahna. Upami eta jamli teh anggeur keneh wae, narkoba teh kudu di piceun / dimusnahkeun. Rek kumaha carana ngarah para rumaja di indonesia teh bersih tina narkoba! Urang oge ulah narima barang ti jalmi nu teu dikenal, bisina eta teh narkoba!

Ratna : Sim kuring Panuju kana pamadegan Elis sareung Sugiyanto, mung aya tambahna. Lamun eta jalmi teh anggeur keneh wae, laporkeun ka pihak anu berwajib, yen manehna sadar ku kalakuanna sareung urang oge ulah poho ka gusti nu maha agung ngarah dijauhkeun dina hal anu goreng jeung ngarugikeun sorangan!

Hatur nuhun ka pamair ti rerencangan sadaya. Tina sawala urang nembe rupina tiasa dicindekeun, yen anu penting teh nyaeta kasadaran urang ngarah teu ngagunakeun narkoba anu bisa ngarugikeun sorangan.

Bapa/Ibu kalih rerencangan sadaya anu dipihormat, rupina sakitu anu tiasa kapidangkeun dina ieu sawala. Hatur sewunuhun kana perhatosana ti sadaya, apunteun bilih aya kalepatan sareung kakirangan.

Wassalamu’alaikum Wr.Wb